Lənkəran şəhər İcra Hakimiyyətinin başçısı Taleh Qaraşov Avropa çempionu olan 13 yaşlı Nizami Əliyevi qəbul edib. Bu haqda məlumatı Cenublu.az bu gün, 19 sentyabr tarixində verir.
İcra başçısı 2 erməni idmançını məğlub edərək Avropa çempionu olan Nizami Əliyevi məşqçi-müəllimi Elnur Həmidovla birgə qəbul edib. Taleh Qaraşov Lənkəran rayonunun Nərimanabad qəsəbə sakini, Azərbaycan Kikboksinq Federasiyasının idmançısı, 13 yaşlı Nizami Əliyevi Avropa çempionu olması münasibətilə təbrik edib. O, ölkəmizdə idman sahəsindəki uğurların ilbəil artdığını vurğulayıb və bildirib ki, xalqımız təkcə döyüş meydanında deyil, bütün sahələrdə, o cümlədən idman arenalarında da ermənilərə qalib gəlir. İcra başçısı qalibiyyəti ilə ölkəmizin başını uca etdiyinə, Dövlət Bayrağını qaldırdığına, Dövlət Himnini səsləndirdiyinə, erməni idmançıları məğlub etdiyinə görə gənc idmançıya təşəkkür edib və Avropa çempionu olan lənkəranlı idmançını mükafatlandırıb.
Qeyd edək ki, Türkiyənin İstanbul şəhərində keçirilən kikboksinqin Wako versiyası üzrə Avropa çempionatında Nizami Əliyev 32 kq çəki dərəcəsində 1-ci rəqibinə (Papyan Serj) 3:0 hesabı ilə qalib gəlib və finalda 32 kq çəki dərəcəsində erməni rəqibi (Mark Mikayelyana) 3:0 hesabı ilə qalib gələrək Avropa çempionu adını qazanıb.
