Əslən Masallının Ərkivan qəsəbəsindən olan Rüfət Əzizov Prezident İlham Əliyevin Sərəncamına əsasən, Sumqayıt Dövlət Universitetinin rektoru təyin olunub. Bu haqda məlumatı Cenublu.az bu gün, 14 sentyabr tarixində Metbuat.az-a istinadən verir.
Rüfət Əzizov 1998-ci ildə Beynəlxalq Mendeleyev Kimya Olimpiadasının qalibi kimi M.V.Lomonosov adına Moskva Dövlət Universitetinin Kimya fakültəsinə imtahansız qəbul olunub və 2003-cü ildə bitirib. Həmin universitetdə aspirantura təhsilinə davam edərək 2006-cı ildə namizədlik dissertasiyasını müdafiə edib və kimya elmləri namizədi (PhD) elmi dərəcəsini alıb. 2008-ci ildə peşəkar inkişaf proqramını bitirərək London Materiallar İnstitutunun peşəkar üzvlüyünə qəbul olub (Chartered Scientist). ADA Universitetində Biznesin təşkili və idarə edilməsi ixtisası üzrə magistr təhsili alıb. 2014-2016 illərdə ADA və Maastricht universitetlərinin birgə MBA proqramını, 2018-2020-ci illərdə isə Oksford Universitetinin (Said Business School) ali biznes idarəçiliyi üzrə Executive MBA proqramını bitirib.
Əlavə olaraq, bir çox kurslarda və təlimlərdə iştirak edib. Onlardan Kornell Universiteti - ali idarəetmə, Corc Vaşinqton Universiteti - layihələrin idarə olunması və Oksford Universiteti - süni intellekt proqramını qeyd etmək olar.
Bakı Ali Neft Məktəbinin MBA proqramı, kimya mühəndisliyi magistratura proqramında, eləcə də Layihələrin İdarə Olunması Məktəbində (PMI sertifikat) dərs deyir. Oksford Universitetinin İnnovasiyalar mərkəzində elmi nəticələrin kommersiyalaşdırılması proqramında ekspert kimi fəaliyyət göstərir. Amerikan brendi olan “Engineering For Kids” şirkətinin Azərbaycan üzrə təmsilçisi olan STEM Təhsil Mərkəzinin təsisçisidir. Müxtəlif illərdə IJSO, ISEF və digər beynəlxalq elm yarışmalarında münsif olaraq iştirak edib. 2005-2011-ci illərdə BP Exploration LTD-də, 2012-ci ildən isə “Unimetal” MMC-də çalışıb. O, 2021-ci ildən son təyinatınadək Elm və Təhsil Nazirliyinin tabeliyində olan Təhsil İnstitutunun direktoru vəzifəsində çalışıb.
R.Əzizovun babası Məhərrəm Əzizov Ərkivan qəsəbəsində (İsoba məhəlləsi) anadan olub.
