İran-Azərbaycan sərhədini pozmağa cəhd göstərən şəxslər saxlanılıb. Bu haqda bu gün, 2 mart tarixində Cenublu.az Lent.az-a istinadən xəbər verir.
2 mart 00:10-da Astara rayonu, Alaşa kəndi yaxınlığında yerləşən sərhəd zastavasının xidməti ərazisində sərhəd naryadı tərəfindən naməlum şəxslərin İrandan Azərbaycan istiqamətində dövlət sərhədini pozmaları müşahidə edilib. Aparılmış axtarış-əməliyyat tədbirləri nəticəsində ərazidən 90-BZ-775 dövlət nömrə nişanlı “VAZ-2107” markalı avtombillə uzaqlaşmağa cəhd edən Şirvan şəhər sakinləri - 48 yaşlı Əliyev Əli İsrafil oğlu, 21 yaşlı Balayev Arif Alxas oğlu və avtomobilin sürücüsü, 36 yaşlı Mirzəyev Kamal Əliməmməd oğlu saxlanılıblar. Şəxslərin üzərinə baxış zamanı 2 ədəd bağlamada ümumi çəkisi 10 kiloqram 155 qram narkotik maddə marixuana aşkar olunaraq götürülüb.
Saxlanılarkən A.Balayev sərhəd naryadının qanuni tələblərinə məhəl qoymayaraq müqavimət göstərib, qaça bilməyəcəyini anladıqda isə üzərində olan bıçaqla özünə xəsarət yetirib. A.Balayevə dərhal ilkin tibbi yardım göstərildikdən sonra Lənkəran rayon Mərkəzi Xəstəxanasına təxliyə edilib.
