Milli Kitabxanada “Şair, tərcüməçi Dilsuz Mustafayev və professor Zeydulla Ağayev” adlı ənənəvi kitab sərgisi açılıb.
Cenublu.az xəbər verir ki, sərgidə professor Zeydulla Ağayevin əsərləri, tərtib və tərcümələri, ön söz yazdığı, redaktor olduğu, rəy verdiyi kitablar, həyat və yaradıcılığı haqqında Azərbaycan və xarici dillərdə ədəbiyyatlar nümayiş olunur.
Azərbaycan filoloq alimi, tərcüməçi, filologiya elmləri doktoru, professor Zeydulla Ağayev 1945-ci il martın 2-də Masallı rayonunda anadan olub. Azərbaycan Pedaqoji Xarici Dillər İnstitutunun İngilis dili fakültəsini bitirib. Əmək fəaliyyətinə həmin institutda başlayıb, ali məktəbin “Bilik” qəzetinin redaktoru olub. Zeydulla Ağayev həm öz orijinal nəsr əsərləri, həm də ingilis dilindən etdiyi tərcümələri ilə tanınıb. Professor bir sıra nəsr kitablarının -“Məhəbbət nəğməsi”, “Beş günün intizarı”, “Yenilməzlik”, “Dünyanın düz vaxtı” və s. müəllifidir.
Sərgi bir həftə davam edəcək.
