Məhərrəmlik məclisindən sonra qohumunu döyən qardaşlardan biri amnistiyaya düşüb.
Ali Məhkəmədə qəsdən sağlamlığa az ağır zərər vurma və xuliqanlıqda təqsirləndirilən Mircəfər Nəbiyev və qardaşı Mirhadı Nəbiyevlə bağlı kassasiya şikayətinə baxılıb. Hakim Nazim Mövsümovun sədrliyi ilə keçirilən iclasda qərar elan olunub.
İttihama görə, hadisə 23 iyul 2023-cü ildə, saat 21 radələrində Saatlı rayonunun Seyidlər kəndində, məscidin qarşısında baş verib. Mircəfər və Mirhadı məhərrəmlik ayı ilə bağlı məsciddə keçirilən məclisdə iştirak etdikdən sonra həyətə çıxıblar və bacılarının qaynı Hafiz Nəbiyevi çölə çağırıblar. Mübahisəyə səbəb isə zərərçəkmişin onların bacısının ailə həyatına müdaxilə etməsi iddiası olub.
Hafiz Nəbiyev məscidin həyətindən küçəyə çağırıldıqdan sonra qardaşlar onu yumruq və təpiklə döyərək bədəninin müxtəlif nahiyələrinə zərbələr endiriblər. Hadisədən sonra hər iki şəxs saxlanılıb və cinayət məsuliyyətinə cəlb olunub.
Saatlı Rayon Məhkəməsi əvvəlcə Mircəfəri qəsdən sağlamlığa az ağır zərər vurma maddəsi ilə 3 il müddətinə azadlığın məhdudlaşdırılması, yəni elektron qolbaq cəzasına məhkum etmişdi. Qardaşı Mirhadı isə xuliqanlıq ittihamı üzrə təqsirsiz sayılaraq bəraət almışdı.
Lakin Şirvan Apellyasiya Məhkəməsi bu hökmü ləğv edib. Yeni qərara əsasən, Mirhadı Nəbiyev 2 il 6 ay müddətinə azadlığın məhdudlaşdırılması cəzasına məhkum edilib, Mircəfər Nəbiyevə isə 2 il müddətinə azadlıqdan məhrumetmə cəzası verilib. Son qərarla isə Mircəfərin cəzası amnistiya əsasında 6 ay azaldılıb.
Qeyd edək ki, adlar və soyadlar şərtidir.
