Bu gün Vətən müharibəsi şəhidimiz Firavan Əsgərovun doğum günüdür.
Firavan Xanbala oğlu Əsgərov 2001-ci il martın 14-də Sabirabad rayonunun Surra kəndində anadan olub.
44 günlük Vətən müharibəsinin qəhrəmanı Firavan Əsgərov müharibə başlayan ilk gündən Talış və Suqovuşan yüksəkliklərinin alınmasında gedən ağır döyüşlərdə, məşhur "Koroğlu postu"nu düşməndən geri alınmasında iştirak edib.
Oktyabrın 20-də Hadrut qəsəbəsinin azad edilməsi uğrunda aparılan əməliyyatda gecə ikən komandanlıqdan xüsusi tapşırıq alan 17 nəfərlik dəstə ərazidə əlverişli mövqe tutub. Dəstənin iki döyüşçüsü, biri Firavan Əsgərov olmaqla düşmən mövqelərini təyin etmək məqsədilə kəşfiyyata göndərilib. Tapşırığı icra edərkən ermənilərlə üzbəüz gələn kəşfiyyatçılar onlarla əlbəyaxa döyüşə giriblər. Firavan təkbaşına 10 nəfərdən çox düşmən əsgərini və zabitini məhv etsə də, bu onun son döyüşü olub və aldığı ağır güllə yarasından şəhidlik məqamına ucalıb.
Firavan Əsgərov döyüşlərdə göstərdiyi qəhrəmanlığa görə ölümündən sonra "Hərbi xidmətlərə görə" , "Vətən Uğrunda, "Cəbrayılın azad edilməsinə görə", "Füzulinin azad edilməsinə görə" medalları və III dərəcəli "Rəşadət" ordeni ilə təltif edilib.
