Lənkəranlı məktəblilərin hazırladığı "ağıllı çəkmələr" maraq doğuran layihələrdən birinə çevrilib.
Cenublu.az xəbər verir ki, Lənkəran rayonu Boladi kəndi Nahir Axundov adına 1 nömrəli tam orta məktəbin şagirdləri "Əsgəri xəbərdarlıq etməklə minadan qoruyan ağıllı ayaqqabılar" adlı layihə hazırlayıblar. Layihənin əsas məqsədi mina təhlükəsi olan ərazilərdə hərəkət edən hərbçilərin və minaaxtaranların təhlükəsizliyini artırmaqdır.
Şagirdlərin hazırladığı sistem ayaqqabının alt hissəsində yerləşdirilən xüsusi mina detektoru prototipi üzərində qurulub. Sistem torpağa tam təmas baş verməzdən əvvəl metal mina ehtimalını müəyyən edərək istifadəçiyə səs, vibrasiya və ya işıq siqnalı ilə xəbərdarlıq edir.
Layihəyə dəstək olan məktəbin fizika müəlliminin sözlərinə görə, ayaqqabıda istifadə olunan piezo element addım zamanı yaranan enerjini elektrik enerjisinə çevirərək batareyanın doldurulmasına kömək edir. Bu isə cihazın əlavə enerji mənbəyi olmadan daha uzun müddət işləməsinə imkan yaradır.
Qeyd edək ki, layihə "Sabahın alimləri" Respublika layihə müsabiqəsinin XV buraxılışında təqdim olunaraq qızıl medal qazanıb.
