Lənkəran Ağır Cinayətlər Məhkəməsində yol qəzası törətməkdə təqsirləndirilən Ramil Rəsulovun cinayət işi üzrə məhkəmə prosesi başa çatıb.
İttihama əsasən, hadisə 20 iyul 2025-ci il tarixdə, saat 22:10 radələrində Sabirabad rayonunun Xəlfəli kəndində baş verib. Ramil Rəsulov idarə etdiyi “VAZ-21070” markalı avtomobillə hərəkətdə olarkən piyada Sürət Əzizovu vurub. Aldığı ağır xəsarətlər nəticəsində piyada hadisə yerində dünyasını dəyişib.
Məhkəmədə dindirilən zərərçəkmiş şəxsin hüquqi varisi – mərhumun həyat yoldaşı bildirib ki, hadisə zamanı əri mağazaya gedərkən avtomobil vurması nəticəsində ölüb. Onun sözlərinə görə, təqsirləndirilən şəxslə barışıq əldə olunub, ailəyə 15 000 manat maddi yardım göstərilib və zərər tam ödənilib.
Buna baxmayaraq, məhkəmənin qərarı ilə Ramil Rəsulov cəzasını məntəqə tipli cəzaçəkmə müəssisəsində çəkməklə 5 il müddətinə azadlıqdan məhrum edilib.
