Sabiq xarici işlər naziri, politoloq Tofiq Zülfüqarov Lənkəranın natəmizliyi barədə paylaşım edib. Bu haqda məlumatı Cenublu.az bu gün, 30 oktyabr tarixində Bizim.media-ya istinadən verir.
Belə ki, o, Lənkərana səfəri zamanı şəhərin mərkəzinin çirkli olduğunu, Lənkəran Dövlət Dram Teatrının yanında zibillərin yandırılması halı ilə rastlaşdığını bildirib.
Məsələ ilə bağlı Lənkəran şəhər İcra Hakimiyyətindən bildirilib ki, Qala Xiyabanı küçəsinin zibillənməsi ilə bağlı sosial şəbəkələrdə yayılan məlumatlar həqiqəti əks etdirmir:
“Aidiyyəti xidmət idarələri tərəfindən bütün şəhər və rayon ərazisində, eləcə də sözügedən ərazidə mütəmadi zibillərin yığılması həyata keçirilir. Lənkəran Şəhər İcra Hakimiyyəti (ŞİH) rayonun bütün ərazisinin səliqə-sahmanına gündəlik fəaliyyət istiqaməti kimi daim ciddi yanaşır və sakinlərimizin rahatlığı üçün bütün mümkün addımları atır.
Hazırda şəhərin sözügedən küçəsinin bir hissəsində abadlıq-bərpa və təmir işləri həyata keçirilir. Sakinlərimizin istək və arzularına uyğun olaraq, Qala Xiyabanı küçəsində sıradan çıxmış üzlüklər sökülərək yeni mərmər qarışıqlı beton plitələrlə əvəzlənir.
Bununla belə, bəzi insanlar tərəfindən şəhərin səliqə-sahmanına riayət olunmaması halları müşahidə edilir.
Sakinlərimizdən və şəhərimizin qonaqlarından xahiş edirik ki, şəhərimizin təmiz və səliqəli saxlanılmasına ciddi şəkildə riayət etsinlər. Xatırladırıq ki, ictimai yerləri zibilləmək, eləcə də ətraf mühitə müxtəlif növ ziyan vurmağa görə İnzibati Xətalar Məcəlləsinə uyğun olaraq cərimələr tətbiq olunur”.
