Rusiya ordusunun tərkibində Ukraynada döyüşən daha bir azərbaycanlı həlak olub.
Musavat.com xəbər verir ki, 61 yaşlı Ağayev Əlövsət Bürhan oğlu Luqansk istiqamətində həyatını itirib.
Əslən Lerik rayonu Şivlə kəndindən olan Əlövsət Ağayev uzun illər Samara vilayətində yaşayırmış. Rusiya vətəndaşı olan mərhum iki oğul, bir qız atasıdır. Yaxınlarının verdiyi məlumata görə, bu yaşda onun orduya yollanması ailəsi üçün də qaranlıq qalıb.
Əlövsət Ağayev keçən ilin oktyabr ayında həyat yoldaşına deyib ki, xaricə gedirəm. Ancaq 5 gün sonra Rusiyada yaşayan qardaşına zəng edərək “mən ordudayam, məcbur oldum, gəldim”, deyib.
Soydaşımızın döyüşlərdə nə vaxt həlak olduğu bilinmir. “Yalnız orduya aparıldıqdan 2 ay sonra qızına zəng edib ki, bizi ön cəbhəyə apardılar. Ondan sonrakı bir il ərzində mərhumdan xəbər olmayıb. Qardaşına zəng ediblər ki, həlak olub, vəssalam. Hətta onun döyüşdüyü alayın tamamilə məhv edildiyi bildirilir”, - deyə mərhumun qohumu deyib.
O, Samarada dəfn edilib.
Məlumata görə, hərbi komissar da yas məclisinə gəlibmiş. Hətta deyirmiş onların atasında dostluq münasibətləri var imiş. Lakin orduya necə, hansı şəraitdə aparıldığını açıqlamayıb.
Yaxınlarının dediyinə görə, Əlövsət Ağayev sovetlər zamanı hərbi xidmətdən qayıtdıqdan bir-iki il sonra yenidən Rusiyaya gedib və o vaxtdan orada yaşayırmış. Kifayət qədər imkanı, nüfuzu olan mərhum mağazalar şəbəkəsinin rəhbəri imiş. Uzun zamandır ticarətlə məşğul olan Ağayevin ərzaq və gül mağazaları var.
