Rəssam Mikayıl Abdullayev yaşadığı illər ərzində bir neçə dəfə Azərbaycanın Cənub bölgəsinə səfər edib. Cənub zonasında olarkən rəssam müxtəlif əsərlər yaradıb.
1955-ci ildə Abdullayev Masallı rayonuna gəlir. Burada olduğu müddətdə rəssam “Masallı silsiləsi”ni yaradır. Bu silsilə rəsmlərə “Körpəsinin ardınca”, ”Manqa başçısı Rəxşəndə”, “Məktəbli qızlar”, “Balaca çoban”, “Rəfiqələr”, “Sevinc” kimi əsərlər daxildir. Bu tablolarda Mikayıl Abdullayev, əsasən, kənddə yaşayan insanları təsvir edib.
“Masallı silsiləsi”nə daxil olan əsərlərdən ən təsirlisi “Sevinc”dir, buna səbəb isə bu tablonun ana sevgisini əks etdirməsidir. Bu əsər 1956-cı ildə ərsəyə gəlib. Tablo 1957-ci ildə Moskva şəhərində sərgiləndikdən sonra bir çox xarici ölkələrə göndərilib. Həmin zaman birinci dəfə əsəri görən akademik İqor Qrabar bu tablo haqqında deyib: “Müəllifin “Sevinc” adlandırdığı tabloda bol-bol rəng və işıq mövcuddur. Burada cənub təbiətinin qoynunda, yaşıllıqda körpəsi ilə qadın əyləşmişdir…”. “Sevinc” əsəri 1958-ci ildə Brüsseldə Ümumdünya Sərgisinin SSRİ pavilyonunda nümayiş edilib. Bundan əlavə, 1958-ci ildə əsər SSRİ Rəssamlıq Akademiyasının gümüş medalına layiq görülüb.
1960-cı illərdə rəssam Cənub bölgəsinə aid “Astarada çay yığımı”, “Masallı qızları”, “Lənkəranlı qadın”, 1970-ci illərdə “Çəltik becərənlər”, sonralar isə “Cənublu qız” əsərlərini yaradıb. Bu əsərlər dünyanın müxtəlif ölkələrindəki sərgilərdə nümayiş olunub. Məhz “Çəltik becərənlər” əsərinə görə Mikayıl Abdullayev Azərbaycan SSR Dövlət mükafatına layiq görülüb.
Qeyd edək ki, 1921-ci il dekabrın 19-da dünyaya göz açan rəssam 2002-ci avqustun 21-də vəfat edib.
