Lənkəran şəhər İcra Hakimiyyəti Rəsilə Arifqızının Lənkəran şəhər Osman Mirzəyev asına qarışıq tipli uşaq evinə direktor təyin olunması barədə açıqlama verib. Bu haqda məlumatı Cenublu.az bu gün, 26 sentyabr tarixində verir.
Bildirilib ki, Lənkəran ŞİH başçısının sabiq müavini Rəsilə Arifqızının Lənkəran şəhər Osman Mizəyev adına qarışıq tipli uşaq evinə direktor təyin olunması ilə bağlı mətbuatda və sosial şəbəkə seqmentində yayılan informasiyalar həqiqəti əks etdirmir:
“Hazırda sözügedən vəzifə vakantdır. Bir daha media nümayəndələrindən və sosial şəbəkə istifadəçilərindən xahiş edirik, dəqiqləşdirilməmiş, eləcə də əsası olmayan məlumatları paylaşmasınlar”.
Qeyd edək ki, ötən gün Rəsilə Arifqızının qarışıq tipli uşaq evinə direktor təyin olması barədə yayılan xəbərlər sosial şəbəkə istifadəçiləri tərəfindən birmənalı qarşılanmayıb. Məktəb uşağını döydüyü üçün Lənkəran ŞİH müavini vəifəsindən kənarlaşdırılan xanımın uşaq evinə direktor qoyulması bir çoxlarının qəzəbinə tuş gəlib.
Məlumat üçün bildirək ki, Rəsilə Arifqızı mediada Lənkəran şəhər 4 saylı orta məktəbinin 9-cu sinif şagirdini döymə ilə gündəmə gəlmişdi. Sözügedən məsələdən sonra o, Lənkəran ŞİH müavini vəzifəsindən azad olunmuş və barəsində Cinayət Məcəlləsinin 309.1-ci (vəzifə səlahiyyətlərini aşma) maddəsi ilə cinayət işi başlanılmışdı. Məhkəmənin hökmü ilə o, 4 min manat məbləğində cərimə olunub.
