Astara Rayon İcra Hakimiyyətinin başçısı Qəzənfər Ağayev Pəlikəş inzibati ərazi dairəsi üzrə nümayəndəliyinin Dolu kəndində əhali ilə səyyar qəbul və görüş keçirib. Bu haqda məlumatı Cenublu.az bu gün, 8 sentyabr tarixində verir.
Görüşdə rayonun inzibati orqanlarının, idarə və müəssisələrinin rəhbərləri iştirak ediblər. İcra başçısı bildirib ki, son dövrlər ərzində Dolu kəndi ilə yanaşı, Şəvqo, Sibiyyət, Diqo, Avyarud kəndlərinə də avtomobil yolu və elektrik xətti çəkilib, üç kənddə ibtidai məktəblər üçün modul tipli binalar quraşdırılıb. Yol çəkilişindən sonra abadlıq işləri genişlənib, yol boyu yeni obyektlər, kəndlərdə müasir tipli evlər inşa edilib. Bu səfalı yerləri görmək üçün gələn turistlərin sayı da xeyli çoxalıb.
Kənd sakinləri çıxış edərək görülən işlərlə yanaşı, kənd ibtidai məktəbinin ümumi orta məktəbə çevrilməsinə, Dolu kəndindən Reqloba kəndinə qədər avtomobil yolunun çəkilməsinə, kənddə qəzalı vəziyyətdə olan elektrik dirəklərinin dəyişdirilməsinə, məhəllə yolunun genişləndirilməsi üçün texnikanın verilməsinə köməklik göstərilməsini xahiş etdiblər.
İcra başçısı vətəndaşlar tərəfindən verilən təkliflərə münasibət bildirib, qaldırılan məsələlərin həlli üçün çalışacağını vurğulayıb.
