Qarakənd faciəsində həlak olmuş ictimai-siyasi xadim, ədəbiyyatşünas, publisist, SSRİ-nin xalq deputatı olmuş Vəli Hüseyn oğlu Məmmədovun anım günüdür.
O, 1931-ci il yanvarın 7-də Yardımlı rayonunda anadan olub və bu rayondakı orta məktəbdə təhsil almışdı. Anası Mina xanım almanəsilli, atası Hüseyn rayonunun Şiləvəngə kəndindən idi.
Hələ orta məktəbdə oxuyarkən əmək fəaliyyətinə başlayaraq Yardımlı Dövlət Bankında mühasib işləyib. Daha sonra Bakı Dövlət Universitetinin filologiya fakültəsində təhsil alıb (1947-1952).
Təhsilini başa vurduqdan sonra BDU-da rus ədəbiyyatı kafedrasında baş laborant vəzifəsində çalışıb (1952-1953).
Vəli Məmmədov sonrakı əmək fəaliyyətində Nizami adına Ədəbiyyat İnstitutunda kiçik elmi işçi, Azərbaycan KP MK-da təlimatçı, şöbə müdiri (1960-1963), Baş Siyasi Ədəbiyyat İdarəsinin rəisi (1963-1965), Azərbaycan KP MK-da elm və mədəniyyət şöbəsinin müdir müavini (1965-1966), Bakı şəhər partiya komitəsində ideologiya üzrə katibi (1966-1971), Siyasi Maarif Evinin müdiri, eyni zamanda Azərbaycan KP MK-da təbliğat və təşkilat şöbəsinin müdir müavini (1971-1988), Səbayel Rayon Partiya komitəsinin 1-ci katibi vəzifələrində işləyib.
Bununla belə, tələbəlik dövründən ədəbi fəaliyyətlə ardıcıl məşğul olmuşdur.
1991-ci il noyabrın 20-də Qarakənd səmasında Azərbaycanın bir qrup görkəmli dövlət xadimini Ağdama aparan helikopterin müəmmalı şəkildə partlaması nəticəsində indiki Səbail (o zamanlar 26 Bakı komissarı) rayon Partiya Komitəsinin birinci katibi olan Vəli Məmmədov faciəli şəkildə həyatını itirdi.
Vəli Məmmədovun gündəliyindən:
“Mənim başımı Meydan ağartdı, Dağlıq Qarabağda ermənilərin başımıza gətirdiyi bəlalar ağartdı. 26-lar rayonunun (indiki Səbail) birinci katibi olana qədər də xalq hərəkatında iştirak edirdim. Hələ fevral hadisələri vaxtı (1988-ci ilin əvvəllərində) Siyasi Maarif evinin direktoru olsam da, bütün yığıncaqlara gəlirdim. Hətta bir dəfə Həsən Həsənov zarafatla dedi ki, “deyəsən, bu işlərdə sənin də əlin var, harada gurluq olarsa, sən ordasan”.
