Lokal xarakterli antiterror tədbirlərinin dayandırılması barədə razılıq əldə olunub. Bu haqda məlumatı Cenublu.az bu gün, 20 sentyabr tarixində verir.
Belə ki, Müdafiə Nazirliyinin verdiyi məlumata əsasən, Qarabağın erməni sakinləri nümayəndələrinin Rusiya sülhməramlı kontingenti vasitəsilə müraciətini nəzərə alaraq, 2023-cü il sentyabrın 20-də saat 13:00-da aşağıdakı şərtlər altında lokal xarakterli antiterror tədbirlərinin dayandırılması barədə razılıq əldə olunub:
- Azərbaycan Respublikasının Qarabağ bölgəsində yerləşən Ermənistan silahlı qüvvələrinin birləşmələri, qeyri-qanuni erməni silahlı dəstələri silahı yerə qoyur, döyüş mövqelərindən və hərbi postlardan çıxır və tam şəkildə tərksilah olunurlar. Ermənistan silahlı qüvvələrinin birləşmələri Azərbaycan ərazilərini tərk edir, qeyri-qanuni erməni silahlı dəstələri buraxılır;
- Paralel şəkildə bütün silah-sursat və ağır texnika təhvil verilir;
- Yuxarıda qeyd olunan proseslərin Rusiya sülhməramlı kontingenti ilə əlaqələndirilmiş şəkildə həyata keçirilməsi təmin edilir.
Prezident Administrasiyasından bildirilib ki, Azərbaycan Respublikasının Konstitusiyası və qanunları əsasında reinteqrasiya məsələlərinin müzakirə edilməsi üçün Qarabağın erməni sakinlərinin nümayəndələri ilə 2023-cü il sentyabr 21-də Yevlaxda görüş keçiriləcək.
Qeyd edək ki, antiterror tədbirləri zamanı 90-dan artıq döyüş mövqeyi və bir sıra strateji əhəmiyyətli obyektlər nəzarətə götürülüb, habelə 7 nəqliyyat, 4 minataan, 1 tank, 2 piyada döyüş maşını da qənimət olaraq ələ keçirilib.
