Astara və Masallıda polis əməkdaşları Vətən müharibəsi şəhidlərinin məzarını ziyarət ediblər. Bu haqda məlumat bu gün, 27 sentyabr tarixində Daxili İşlər Nazirliyindən Cenublu.az-a verilib.
Astara rayon Polis Şöbəsinin rəhbərliyi torpaqlarımızın düşmən işğalından azad edilməsi uğrunda gedən döyüşlərdə şəhidlik zirvəsinə ucalan Daxili Qoşunların şəhid hərbi qulluqçusu, baş çavuş Orxan Babayevin məzarını və rayonun Kijəbə qəsəbəsində yaşayan ailəsini ziyarət ediblər. Polis əməkdaşları onların qayğıları ilə maraqlanıb, şəhidin əziz xatirəsini yad edib və ailəyə maddi dəstək göstəriblər. Ziyarət zamanı şəhidimizin igidlik və qəhrəmanlığının gənc nəsillər üçün daim örnək olacağı qeyd olunub.
Şəhid hərbi qulluqçunun valideynləri göstərilən diqqətə görə ölkə və DİN rəhbərliyinə minnətdarlıqlarını ifadə ediblər.
Masallı rayon Polis Şöbəsinin əməkdaşları Vətən müharibəsində şəhid olmuş DİN-in Daxili Qoşunlarının hərbi qulluqçuları çavuş Cavad İbadov və Ramazan Vəliyevin məzarlarını ziyarət ediblər. Hər iki şəhidin əziz xatirəsi yad olunub, onların misilsiz şücaətinin heç bir vaxt unudulmayacağı qeyd olunub.
[URIS id=25493]
