Parazitlər təsərrüfatlardakı yüzlərlə arıxanaları sıradan çıxararaq arıçılara xeyli ziyan vurub.
Cenublu.az-ın verdiyi xəbərə görə, son illər qlobal iqlim dəyişikliyi bir çox ölkələrdə olduğu kimi ölkəmizdə də arı ailələrində parazitlərin inkişafına səbəb olub. Bu mövsüm Biləsuvar rayonunda fərdi arıçılıq təsərrüfatlarına yol tapan “Varrua” və “Tropi-elapses” parazitləri arıçıların yüzlərlə arı ailəsini məhv edib. Mütəxəssislər bu virusun qısa vaxt ərzində ölkəni əhatə edəcəyindən narahatdırlar. Asiyadan qonşu ölkələrə ayaq açan bu parazitlər Dağıstan Respublikası ərazisindən şimal rayonlarına yayılmaqla cənuba doğru irəliləməkdədir.
Azərbaycan Arıçılar Assosiasiyasının Biləsuvar filialının sədri Hikmət Əliyev bildirir ki, hazırkı durumda arıları sözügedən zərərvericilərdən qismən də olsa, qorumaq üçün çıxış yolu var. Dərman preparatları ilə mümkün olmayan yeni mübarizə üsulu arı qutularında izolyator rolunu oynayan xüsusi “ana arı” qəfəsciklərinin hazırlanmasıdır. “Yəni ana arı izolyatorda olur, işçi arılar ora girib çıxır, ana arıya qulluq edirlər. İstər “Varrua” olsun, istər “Tropi-elapses” sürfələrlə qidalanır və onların inkişafı dayanacaq, həndəsi silsilənin qabağı alınacaq və bal süzümündən sonra onlarla mücadilə aparmaq daha rahat olacaq”.
Assosiasiya sədrinin sözlərinə görə, sözügedən xəstəlikyayıcı parazitlərə görə ölkədə arıçılar təxminən 30 faizə yaxın arı itkisi ilə üzləşib və bu rəqəm getdikcə arta bilər. Buna görə də mübarizə tədbirləri davam etdirilməli və xaricdən uyğun kimyəvi preparatların gətirilməsinə şərait yaradılmalıdır.
Qeyd edək ki, Biləsuvarda 116 fermer arıçılıqla məşğuldur və rayonda arı ailələrinin sayı 4468-ə çatıb.
