Lənkəran rayonunda ikimərtəbəli yaşayış evində yanğın baş verib.
Cenublu.az-ın məlumatına görə, hadisə bu gün səhər saatlarında rayonun Göyşaban kəndi ərazisində qeydə alınıb. Kənd sakini Şamil Həsənağa oğlu Qurbanova məxsus 2 mərtəbəli, 8 otaqlı evdə başlayan yanğın qısa müddətdə ətrafa yayılıb.
Fövqəladə Hallar Nazirliyinin Lənkəran Yanğından Mühafizə Hissəsinin texnika və şəxsi heyəti tərəfindən yanğın söndürülüb, alovun digər otaqlara keçməsinin qarşısı alınıb.
Ev sahibi bildirib ki, yanğın baş verən vaxt ailənin 5 üzvü ilə birlikdə Bakı şəhərində olub. Yaxınlarının zəngi ilə hadisədən xəbər tutan ailə Lənkərana qayıdıb. Evə baxış zamanı bəzi əşyaların yoxa çıxdığı məlum olub. Ev sahibinin iddiasına görə, naməlum şəxslər evə oğurluq məqsədilə daxil olub, mətbəxdə mürəbbə yeyiblər və daha sonra evi yandırıblar.
Daxili İşlər Nazirliyinin Mətbuat Xidmətinin Lənkəran regional qrupunun baş inspektoru Məhəmməd Rzayev bildirib ki, yanvarın 6-da Göyşaban kəndində yerləşən yaşayış evindən oğurluq edilməsi və daha sonra həmin ünvanda yanğın baş verməsi ilə bağlı polisə müraciət daxil olub. Hazırda faktla bağlı Lənkəran Şəhər Rayon Polis Şöbəsində araşdırma aparılır.
Qeyd edək ki, yanğın nəticəsində ev sahibinə təxminən 30 min manat məbləğində maddi ziyan dəyib.
Faktla bağlı araşdırma davam etdirilir.
