Masallı rayonu Mollahəsənli kənd məktəbinin şagirdləri İkinci Dünya müharibəsindən qalan məktəb binasında təhsil alırlar. Bu haqda məlumatı Cenublu.az bu gün, 4 mart tarixində Space TV-yə istinadən verir.
Belə ki, adıçəkilən kənd məktəbi 1943-cü ildə tikilərək istifadəyə verilib. Şəhid Rasim Əliyevin adını daşıyan təhsil ocağı hazırda qəzalı vəziyyətdədir. Binada günü-gündən çatlar artır. Binanın dam örtüyü çökmək üzrədir. Valideynlər isə mövcüd vəziyyətdən narazıdırlar.
247 şagirdin təhsil aldığı məktəbin isidilməsi üçün hələ də odun sobalarından istifadə olunur.
Masallı rayonu üzrə təhsil sektorunun müdiri Qoşqar Hətəmov məsələ ilə bağlı bildirib ki, yeni məktəb binasının tikiləcəyi ilə bağlı aidiyyəti üzrə məlumat verilib. “Növbəti mərhələdə dövlət proqramına uyğun olaraq, Mollahəsənli kənd tam orta məktəbi üçün yeni məktəb binasının tikilməsi nəzərdə tutulub”, - deyə o əlavə edib.
Qeyd edək ki, son 5 ildə Masallı rayonunda 11 məktəb binası tikilib, 24 məktəbdə təmir işləri aparılıb. Hazırda rayonunun Qəzvinoba kənd ümumi orta məktəbi üçün 180 yerlik, Sarıcəfərli kənd ümumi orta məktəbi üçün isə 96 nəfərlik məktəb binalarının inşaları davam edir.
