Ömrünün 50 ilini Azərbaycan təhsilinin inkişafına həsr edən Masallıdan olan Mirqabil Hüseynovun 75 illik yubileyi qeyd olunub.
Cenublu.az xəbər verir ki, yubiley tədbirində çıxış edənlər Mirqabil Hüseynovun Masallı rayonu, eləcə də dövlət üçün gördüyü işlərdən geniş danışıblar.
Qeyd edək ki, Mirqabil Mirhüseyn oğlu Hüseynov 1949-cu il noyabrın 19-da Masallı şəhərində anadan olub. 1970-ci ildə Azərbaycan Dövlət Universitetinin tarix-fəlsəfə fakültəsini bitirib. Həmin ildən şəhər 1 nömrəli orta məktəbində tarix müəllimi və şəhər qiyabi məktəbində metodist kimi fəaliyyətə başlayıb. Hərbi xidmətini başa vurduqdan sonra – 1971-ci ildən şəhər 1, 2 və 3 nömrəli tam orta məktəblərində direktor müavini, 1976-cı ildən şəhər 1 nömrəli tam orta məktəbin direktoru işləyib. 1990-1993-cü illərdə Masallı RİHB-nın müavini vəzifəsində çalışıb. 1992-ci ildə Masallıda yaradılan könüllülərdən ibarət batalyonda I Qarabağ müharibəsinə qatılıb və bir neçə istiqamətdə gedən döyüşlərdə iştirak edib. 1993-cü ildən yenidən şəhər 1 nömrəli orta məktəbin direktoru kimi əmək fəaliyyətini davam etdirib. Ömrünün 50 ilini Azərbaycan təhsilinin inkişafına həsr edən Mirqabil Hüseynov ölkə başçısının müvafiq sərəncamları ilə “Tərəqqi” medalı (04.10.2005) ilə təltif olunub, Əməkdar müəllim (03.10.2013) fəxri adına layiq görülüb.
