Masallı rayonu Qəriblər kəndində yerləşən İstisu “Fatimeyi-Zəhra” şəfa sanatoriyasının təmirə ehtiyacı var. Bu haqda məlumatı Cenublu.az bu gün, 11 oktyabr tarixində Real TV-yə istinadən verir.
Belə ki, kurort və sanatoriyaların özəlləşdirilməsi haqqında Fərmana əsasən, 1997-ci ildə iş adamı İldırım Allahyarov sanatoriyaya qanuni sahib çıxıb. Məsələ ilə bağlı İldırım Allahyarovla əlaqə saxlanılıb.
Sualları kobud şəkildə cavablandıran iş adamı bildirib ki, sanatoriya 2023-cü ilin may ayınadək təmir olunacaq. Daha sonra isə yenidən əlaqə saxlayaraq dediklərindən imtina edib. O, sanatoriyanın yaxşı vəziyyətdə olduğunu və ona şər-böhtan atıldığını bildirib. Daha sonra İldırım Allahyarov əlavə edib ki, sanatoriyanın qanuni sahibi o yox, Zamiq Cavadov adlı şəxsdir.
Zamiq Cavadov da sanatoriyada vəziyyətin çox gözəl olduğunu deyərək, suallara cavab verməkdən imtina etdi.
Məsələ ilə bağlı Masallı rayonu İH-nin Qəriblər kənd İnzibati Dairəsi üzrə nümayəndəliyindən bildirildi ki, Qəriblər kəndi ərazisində yerləşən “Fatimeyi-Zəhra” İstisu şəfa sanatoriyası, həqiqətən də, İldırım Allahyarov tərəfindən işlədilir. Təəssüf ki, obyekt sahibkarın fərdi istifadəsində olduğu üçün icra hakimiyyəti və müvafiq qurumlar tərəfindən heç bir təzyiq göstərmək mümkün deyil.
