Masallı Rayon İcra Hakimiyyəti başçısı Araz Əhmədov rayonun Ərkivan qəsəbəsində müvəqqəti məskunlaşmış Xocalı sakini Quliyev Yusif Məhəmməd oğlunun ailəsi ilə görüşüb. Bu haqda məlumatı Cenublu.az bugün, 24 fevral tarixində verir.
Görüşdə Masallı Rayon İcra Hakimiyyəti başçısının müavini, Sosial-iqtisadi inkişafın təhlili və proqnozlaşdırılması şöbəsinin müdiri Adəm Məhərrəmov, İctimai-siyasi və humanitar məsələlər şöbəsinin müdir müavini – dini qurumlara işin təşkilatçısı Abbas Abbaszadə və Ərkivan qəsəbə İƏD üzrə nümayəndə Əhməd Əhmədov də iştirak ediblər.
Görüş zamanı rayon rəhbəri bildirib ki, Xocalı faciəsi təkcə xocalılılara deyil, bütün Azərbaycan xalqına qarşı yönələn soyqırımıdır. Bu qətliam dünya tarixinə qanlı hərflərlə yazılmış vandal hadisələrdən ən dəhşətlisidir. 44 gün davam edən müharibədə Azərbaycan Ordusu şanlı Qələbə qazanaraq 30 il davam edən işğala son qoydu, ərazi bütövlüyünü bərpa etdi. Müzəffər Ali Baş Komandan İlham Əliyev Azərbaycanın yeni tarixinə öz adını əbədi yazdırdı. Ölkə Prezidenti xalqa verdiyi bütün sözlərə tam əməl edərək üçrəngli bayrağımızı Xankəndində, Şuşada, Xocalıda, Laçında, Kəlbəcərdə, Cəbrayılda, Zəngilanda, Füzulidə və digər rayonlarda şərəflə dalğalandırdı.
Xocalı sakini Kamilə Quliyeva Azərbaycan Respublikasının Prezidenti İlham Əliyevə, Birinci vitse-prezident Mehriban Əliyevaya və Masallı rayonunun icra başçısına diqqət və qayğıya görə dərin təşəkkürünü bildirib.
