Masallı rayonunda Dövlət Məşğulluq Agentliyinin özünüməşğulluq proqramına qoşulan iki sakin onlara verilən inəklərdən şikayətçidir. Bu haqda məlumatı Cenublu.az bu gün, 15 sentyabr tarixində APA TV-yə istinadən verir.
Belə ki, rayonunun ayrı-ayrı kəndlərindən iki vətəndaş cari ilin avqust ayında Dövlət Məşğulluq Agentliyinin özünüməşğulluq proqramına qoşulub və proqram çərçivəsində hər biri 3 baş inək sahibi olub. Vətəndaşlar bildiriblər ki, onlara verilən inəklər sağlam görünsələr də, sonradan onların xəstə olduğu məlum olub.
Sakinlər yerli baytarlara müraciət etsələr də, öz suallarına cavab tapa bilməyiblər. Həmçinin onlarda mal-qaranın yemi üçün kupon olsa da, yem bu günə kimi verilməyib.
Məsələ ilə bağlı Dövlət Məşğulluq Agentliyinə müraciət edilib. Agentliyin sözlərinə görə, rayon sakinləri Babayev Habil Oruc oğlu və Həmidov İsaq Şəkər oğlunun müraciətləri müvafiq qaydada araşdırılıb. Departament direktoru tərəfindən vətəndaşlara hazırkı vəziyyətdə müvafiq sənədləri təqdim etməklə filiala müraciət etmələri tövsiyə edilib.
