Masallı rayon Mərkəzi Kitabxanasının Banbaşı kənd kitabxana filialının təşəbbüsü ilə Binə Xocavar kəndində şəhid Elməddin Nəzərovun məzarı ziyarət edilib. Bu haqda məlumatı Cenublu.az bu gün, 18 noyabr tarixində verir.
Mərasimdə Bəşir Nuriyev adına kənd orta məktəbinin müəllim və şagird kollektivi və şəhid ailəsi iştirak ediblər. Burada şəhidin xatirəsi ehtiramla yad edilib və ruhuna dualar oxunub.
Elməddin Nəzərov 22 noyabr 1996-cı ildə Masallı rayonunun Binə Xocavar kəndində anadan olub. Vətən müharibəsi zamanı döyüşlərdə könüllü iştirak edib. O, oktyabrın 30-da Qubadlının azad edilməsi zamanı şəhid olub. 17 noyabr 2020-ci ildə Binə Xocavar kəndində torpağa tapşırılıb.
Qeyd edək ki, şəhid Elməddin Nəzərov ölümündən sonra “Vətən uğrunda”, “Cəbrayılın azad olunmasına görə” və “Qubadlının azad olunmasına görə” medalları ilə təltif edilib.
