Masallı rayon Sarıcəfərli kənd ümumi orta məktəbinin şagirdləri üçün yeni məktəb tikilərək istifadəyə verilib. Bu haqda məlumatı Cenublu.az bu gün, 20 dekabr tarixində verir.
Belə ki, 96 şagirdlik modul tipli məktəb binasında şagirdlər üçün yüksək səviyyəli tədris şəraiti yaradılıb.
Rayonun Qəznivoba kənd tam orta məktəbinin şagirdləri də yaxın vaxtlarda yeni məktəb binasında dərs keçəcəklər. Çünki onlar üçün köhnə məktəb binası sökülərək yerində müasir tələblərə cavab verən 3 mərtəbəli 2 korpuslu yeni məktəb binası tikilir.
180 şagirdlik məktəb binasının tikintisinə ilin əvvəlindən başlanılıb. Hazırda tamamlanma işləri görülür. Masallıda son 5 ildə 12 məktəb binası tikilib, ikisi əsaslı təmir edilib. Bununla belə rayonda 95 ümumtəhsil müəssisəsindən 25-nin yenilənməsinə ehtiyac var. Onlardan biri də Ərkivan qəsəbə 3 saylı tam orta məktəbidir.
Masallı rayonu üzrə Təhsil Sektorunun müdiri Qoşqar Hətəmovun verdiyi məlumata görə, yenilənməsinə ehtiyac olan bütün tədris müəssisələrinin siyahısı Lənkəran-Astara Regional Təhsil İdarəsinə verilib. Artıq gələn il Musaküçə kənd tam orta məktəbi üçün yeni binanın tikintisi nəzərdə tutulur.
