N.Gəncəvi adına Masallı rayon Mədəniyyət Mərkəzində növbəti seminar-müşavirə keçirilib. Bu haqda məlumatı Cenublu.az bu gün, 30 noyabr tarixində verir.
Mədəniyyət Mərkəzinin direktoru Vəkil İsmailovun sədrliyi ilə baş tutan müşavirədə şəbəkənin tərkibində fəaliyyət göstərən müəssisələrin əməkdaşları iştirak ediblər.
Seminar-müşavirədə Vəkil İsmailov müəssisələrin fəaliyyətinin müxtəlif aspektlərinə toxunub. O, son aylar ərzində həyata keçirilən mədəni-yaradıcı və maarifləndirmə tədbirlərinin əhəmiyyətindən söz açıb, həmçinin qarşıda planlaşdırılan işlərdən bəhs edib.
Sonra müəssisənin bədii rəhbəri Sakit Müslümov çıxış edərək cari və perspektiv planlarla bağlı tövsiyələrini müşavirə iştirakçılarının diqqətinə çatdırıb.
Tədbirin sonunda mədəniyyət sahəsində uzunmüddətli səmərəli əmək fəaliyyəti və 65 illik yubileyi münasibətilə mədəniyyət işçisi Rasim Nuru oğlu Niftiyev Mədəniyyət Mərkəzinin direktoru Vəkil İsmailov tərəfindən Fəxri Fərmanla təltif edilib.
