Bakı şəhərinin Xətai rayonunda 25 yaşlı Əhməd Əhmədovun aralarında yaranmış mübahisə zamanı 27 yaşlı bacısı Elmira Əhmədovanı, onun 5 yaşlı qızı Ülviyyə Əhmədovanı, 52 yaşlı atası Mehman Əhmədovu, 47 yaşlı anası Pikə Əhmədovanı və 9 yaşlı qardaşı Məhəmməd Əhmədovu
qəsdən öldürməsi ilə bağlı əsaslı şübhələr yaranıb. Bu haqda məlumatı Cenublu.az bu gün, 14 fevral tarixində verir.
Belə ki, Əhməd illər əvvəl Masallıda idman yarışında baş nahiyəsindən zədələnib və psixoloji problemləri yaranıb. İddialara görə, o, 15 yaşında 30 bıçaq zərbəsi ilə həmyaşıdını bıçaqlayıb. Hadisədən sonra ailəsi onu bir müddətlik Rusiyaya göndərib.
Yaxınlarının verdiyi məlumata görə, ailə üzvləri onun xəstəxanada müalicə olunması əvəzinə, dərmanlarla ev şəraitində müalicəsini üstün tutublar.
Bir neçə gün əvvəl isə atası Əhmədin dərmanlarını vaxtında qəbul etməməsindən narahat olub və ona Mərdəkanda yerləşən özəl reabilitasiya mərkəzində müalicə almağı təklif edib. Həmçinin ailədə bir müddət imiş ki, mülk üstündə söz-söhbət də olub.
Belə ki, Əhmədin bacısı Elmira Əhmədova həyat yoldaşı ilə Rusiyada yaşayırmış. Bu yaxınlarda E.Əhmədova Bakıya gəlib və ailəsi ona paytaxtın Suraxanı rayonu, Günəşli qəsəbəsində ev bağışlayıb. Əhməd qohumlarına bildirirmiş ki, ailəsinin məqsədi evləri, mülkləri Elmira və qardaşı Məhəmmədə verməkdir. Bundan sonra evdə söz-söhbət başlayıb.
Əhməd Əhmədov ilk növbədə bacısını və onun qızını boyun, bel nahiyəsindən kəsici alətlə vurmaqla qətlə yetirib.
Daha sonra evə gələrək atasını öldürüb və anası Pikə Əhmədovaya zəng edərək onu evə çağırıb. O da kiçik oğlu Məhəmmədi məktəbdən götürərək, evə gəlib. Elə bu zaman qapının girişində anasını və qardaşını balta ilə öldürüb.
Qeyd edək ki, oğlu tərəfindən qətlə yetirilən Əhmədova Pikə Bədəl qızı paytaxtın Xətai rayonunda yerləşən 59 saylı tam orta məktəbin direktoru, Mehman Əhmədov isə 2022-ci ilə qədər "Azərbaycan Dəmir Yolları"nın İnfrastruktur İdarəsində rəis vəzifəsində çalışıb. O, bir neçə il əvvəl “Tərəqqi” medalı ilə təltif edilib.
