Masallı rayonunda 21 yaşlı Səbuhi şəxsi münasibətlər zəminində yaranan mübahisə zamanı həmkəndlisi Surətə xəsarət yetirib.
Demokrat.az xəbər verir ki, hadisə Yolağac kəndində baş verib. Səbuhi həmkəndlisi Surət ilə aralarında şəxsi münasibətlər zəminində baş vermiş mübahisə zamanı onun üz nahiyəsinə qəsdən yumruqla bir zərbə vurub. Onu yerə yıxaraq müxtəlif dərəcəli bədən xəsarətləri yetirib.
Hadisəni törədən Səbuhinin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Səbuhi ona elan olunmuş ittiham üzrə özünü təqsirli bilib. O, ifadəsində bildirib ki, zərərçəkmiş Surət həmkəndlisidir və əvvəllər aralarında heç bir ədavət, düşmənçilik olmayıb: “Məlum hadisə günü yolda gedən zaman Surəti gördüm. Həmin vaxt Surət sərxoş idi. Surət mənə "sən meşəbəyinin “işverəni"sən dedi. Onun nə demək istədiyini başa düşmədim və nə üçün belə bir söz dediyini soruşdum. Surət isə yenə də söyüş və təhqirlə mənə "meşəbəyinin “işverəni" dedi. Surətə meşəbəyinə heç bir aidiyyətimin olmadığını və məni təhqir etməməsini bildirdim. Bu zaman Surət üzərimə gəldi və məni vurmaq istədi, biz əlbəyaxa olduq. Surət məni təhqir etdiyi üçün onun üz nahiyəsinə bir dəfə yumruq ilə zərbə vurdum. Bundan sonra Surət yerə yıxıldı. Yaxınlıqda olan əmim yaxınlaşdı və bizi ayırdı, “"ayıb olsun” deməklə iradını bildirdi. Bundan sonra öz yolumuza davam etdik.. Dalaşdığımız zaman yanımızda heç kim olmayıb”.
Təqsirləndirilən şəxs qeyd edib ki, aralarında olan mübahisə həmin gün saat 21 radələrində Yolağac kəndində baş verib. Buna səbəb isə Surətin küçədə onu heç bir səbəb olmadan söyərək təhqir etməsi olub: “Baş vermiş mübahisə təxminən 3-5 dəqiqə davam etdi və heç kimin narahatçılığına səbəb olmadı. Surəti qəsdən yumruqla vurmaqla ona sağlamlığın qısa müddətə pozulmasına səbəb olan sağlamlığa yüngül zərərvurmaya aid olan xəsarət yetirmişəm”.
Surətin sözlərinə görə, təqsirləndirilən Səbuhi həmkəndlisidir, əvvəllər aralarında ədavət və düşmənçilik olmayıb: “Məlum hadisə günü kənddə olan zaman saat 21 radələrində həmkəndlim Səbuhi çağıraraq dedi ki, sən nə üçün imkan vermirsən ki, biz odun daşıyaq. Yeyənkənd kənd meşəsinin meşəbəyisinin qanunsuz əməllər etməsinə icazə vermirəm, onun barəsində qanuni müraciətlər etmişdim. Bu hal acığıma gəldi. Həmin meşəbəyi ona odun daşımağa icazə vermədiyi üçün məni günahkar bilib. Səbuhi də nə üçün barəmdə şikayət etdiyini soruşdu. Səbuhiyə yaxşı etdiyimi və ona heç bir dəxli olmadığını dedim. Bu zaman Səbuhi qəfildən üz nahiyəmə 2 dəfə yumruq ilə zərbə vurdu. Zərbənin təsirindən yerə yıxıldım. Sonradan ora gələn Səbuhinin əmisi bizi ayırdı”.
Bu cinayət işinə Masallı Rayon Məhkəməsində baxılıb. Məhkəmə təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb. Bu səbəbdən Səbuhinin barəsində olan cinayət təqibinə xitam verilib. O, cinayət məsuliyyətindən azad edilib.
