Nizami Gəncəvi adına Masallı rayon Mədəniyyət Mərkəzində ümummilli lider Heydər Əliyevin xatirəsinə həsr olunmuş “Dahi ömrü” adlı tamaşa-kompozisiya təqdim edilib. Bu haqda məlumatı Cenublu.az bu gün, 9 dekabr tarixində verir.
Tamaşa-kompozisiyanı rayon rəsmiləri, YAP Masallı rayon təşkilatının əməkdaşları, mədəniyyət nümayəndələri, Masallı Dövlət Regional Kollecinin kollektivi izləyiblər.
Çıxışlarda görkəmli dövlət xadimi Heydər Əliyevin şərəfli və mənalı ömür yolu, siyasi fəaliyyəti, xalqımız qarşısındakı tarixi xidmətlərindən bəhs olunub. Həmçinin ümummilli liderin müəllifi olduğu mənəvi-siyasi dəyərlər sistemi və iqtisadi layihələr xüsusi qeyd edilib, ölkəmizin bugünkü parlaq nailiyyətləri vurğulanıb.
Sonra ümummilli lider Heydər Əliyevin xatirəsinə həsr olunan "Dahi ömrü" adlı tamaşa-kompozisiya nümayiş olunub.
Sonda mədəniyyət mərkəzinin solistləri Atamoğlan Zahid və Ruslan Zahidovun ifasında musiqilər səsləndirilib. Masallı Xalq teatrının rejissoru Cəmaləddin Əliyev və Masallı Dövlət Regional Kollecinin tələbələri, həmçinin məktəblilərin iştirakı ilə şeir və monoloqlardan ibarət bədii kompozisiya təqdim edilib.
