Masallıda sürücü toy mərasimi zamanı yolu kəsərək avtoxuliqanlıq edib. Bu haqda bu gün, 2 mart tarixində Cenublu.az Avtosfer.az-a istinadən xəbər verir.
90-LR-002 qeydiyyat nişanlı “BMW” markalı avtomobilin sürücüsü Masallı-Yardımlı-Lənkəran yolunu bağlayaraq şou göstərməyə başlayıb. O, hərəkət hissəsində avtomobili qəflətən sürətləndirməklə davamlı olaraq təkərlərin yolun səthi ilə sürtünməsi səslərini çıxarıb və yolun səthində çoxsaylı təkər izləri buraxaraq avtoxuliqanlıq edib.
İnzibati Xətalar Məcəlləsinin 511-ci maddəsinə əsasən, bu xətanı törətmiş sürücünü nəqliyyat vasitəsini idarə etmək hüququ bir il müddətinə məhdudlaşdırılmaqla beş yüz manatdan yeddi yüz əlli manatadək məbləğdə cərimə və ya nəqliyyat vasitəsini idarə etmək hüququ bir il müddətinə məhdudlaşdırılmaqla işin hallarına görə, onun şəxsiyyəti nəzərə alınmaqla, on beş gündən bir ayadək müddətə inzibati həbs gözləyir.
