Masallıda “Sitrus bitkiçiliyi sahəsində çağırışlar və perspektivlər” mövzusunda görüş keçirilib. Bu haqda məlumatı Cenublu.az bu gün, 28 avqust tarixində verir.
Görüş “Masallı Sənaye Məhəlləsi”nin inzibati binasında Azərbaycan Respublikasının Kiçik və Orta Biznesin İnkişafı Agentliyi tərəfindən 30 yerli sahibkarla keçirilib.
Tədbirdə sitrusçuluq sahəsində fəaliyyət göstərən kiçik ailə kəndli və fermer təsərrüfatlarının könüllülük əsasında kooperasiyasının təşviqi və sitrus bitkiçiliyi sahəsində çağırışlar və perspektivlər barədə ətraflı söhbət aparılıb. Onlara bu sahədə üzləşdikləri çətinliklərin, bilik və bacarıqlarının artırılması və məsləhət xidmətlərinin göstərilməsi barədə lazımi dəstəyin veriləcəyi bildirilib.
Masallı Rayon İcra Hakimiyyəti başçısı aparatının Sosial-iqtisadi inkişafın təhlili və proqnozlaşdırılması şöbəsinin müdir müavini Niyazi Bağırov statistik məlumatlar verərək bildirib ki, 2022-ci ildə rayonda 1 hektar feyxoa, 1,4 hektar limon, 1 hektar portağal və 2 hektar naringi bağları yeni salınıb.
Tədbirin sonunda sahibkarlarla müzakirə aparılıb və onları maraqlandıran suallar aidiyyəti üzrə cavablandırılıb.
