Masallıda Cəbrayıl Şəhəri Günü münasibəti ilə “27 illik həsrətə son” mövzusunda tədbir baş tutub. Bu haqda məlumatı Cenublu.az bu gün, 4 oktyabr tarixində verir.
Çıxışlarda bildirilib ki, 1994-cü il 5 yanvar tarixində Horadiz əməliyyatı zamanı Cəbrayılın Cocuq Mərcanlı kəndi işğaldan azad olunub. 2016-cı il Aprel döyüşləri zamanı Azərbaycan Ordusunun əks-hücumu nəticəsində Lələtəpə yüksəkliyi düşməndən təmizlənib və Cocuq Mərcanlı kəndi Azərbaycan Ordusunun nəzarəti altına keçib. Cəbrayıl rayonuna qayıdış hələ 7 il bundan öncə, Aprel döyüşləri zamanı əldə etdiyimiz qələbədən sonra başlanıb. Cocuq Mərcanlı kəndinə sakinlərin o zaman qayıdışı Müzəffər Ali Baş Komandan İlham Əliyevin də qeyd etdiyi kimi, Böyük Qayıdışın əsasının qoyulması oldu. Öz ev-eşiyindən, doğma yurd-yuvasından məcburi köçkün düşmüş bir milyondan çox soydaşımızın 30 il həsrətlə gözlədiyi Böyük Qayıdış məhz Cəbrayıl rayonundan başladı.
2020-ci ilin oktyabrında İlham Əliyev xalqa müraciətində Cəbrayıl şəhəri və rayonun daha 9 kəndinin işğaldan azad olunduğunu elan edib. Prezident İlham Əliyevin 2020-ci il dekabrın 24-də və 2021-ci il iyunun 24-də imzaladığı müvafiq sərəncamlara əsasən, bir qrup hərbi qulluqçu “Cəbrayılın azad olunmasına görə” medalı ilə təltif edilib. Azərbaycanın Vətən müharibəsində düşmən üzərində qalib gəlməsindən 6 gün sonra – 2020-ci il noyabr ayının 16-da Prezident İlham Əliyev və birinci xanım Mehriban Əliyeva işğaldan azad edilən Cəbrayıl rayonunda olublar. Prezident Cəbrayıl şəhərində və Xudafərin körpüsündə şanlı Azərbaycan bayrağını qaldırıb. Həmçinin Prezident İlham Əliyev ötən il oktyabrın 4-də Cəbrayıl rayonunda səfərdə olub.
Sonda Masallı Dövlət Regional Kollecinin tələbələri tədbir iştirakçılarına “Qələbə müjdəsi“ adlı kompozisiya təqdim ediblər.
