Masallı RİH başçısı Araz Əhmədov Sərçuvar ərazisində səyyar görüş-qəbul keçirib. Bu haqda məlumatı Cenublu.az bu gün, 30 sentyabr tarixində Masallı RİH-yə istinadən verir.
Səyyar görüş-qəbulda rayonun idarə, müəssisə və təşkilat rəhbərləri, şəhid ailələri, qazilər, din xadimləri, ağsaqqallar, ziyalılar və kənd sakinləri iştirak ediblər.
İlk öncə Azərbaycanın Milli Qəhrəmanı Səfəralı Məmmədovun və kənd şəhidlərinin şərəfinə olan abidə-bulaq kompleksi ziyarət olunub.
Sonra Masallı RİH başçısı Araz Əhmədov qəbula gələnləri salamlayıb və səyyar görüş-qəbulunu açıq elan etdikdən sonra Masallı RİHB aparatının Sənədlərlə və vətəndaşların müraciətləri ilə iş şöbəsinin müdiri Afəddin Kərimov rayon rəhbərinin 11 avqust 2022-ci il tarixdə ərazi sakinləri ilə görüşü zamanı onların müraciətlərinin həlli ilə bağlı məlumat verib.
Vətəndaşlar isə öz növbələrində içməli su xəttinin çəkilməsi, kəndin mərkəzi yolunda asfalt örtüyünün dəyişdirilməsi, Sərçuvar-Sirəbil yolunun əsaslı təmir olunması, ərazidəki Kor çayının təmizlənməsi və digər sosial məsələlər barədə müraciətlər ediblər.
İcra başçısı görüşü yekunlaşdıraraq, qaldırılan məsələlərin həlli istiqamətində müvafiq qurumlara tapşırıqlar verib. Məsələlərdən bir neçəsi dərhal yerindəcə həll olunub, digər məsələlər barəsində müraciət edən vətəndaşlara qanunamüvafiq izahatlar verilib.
