Bu gün Azərbaycan Silahlı Qüvvələrinin əsgəri Şəmsəddin Təhməzovun şəhidlik zirvəsinə ucaldığı gündür.
Şəmsəddin Sərvər oğlu Təhməzov 3 mart 2001-ci ildə Masallı rayonunun Güllütəpə kəndində anadan olub. Yeni Zuvand kənd tam orta məktəbində ibtidai təhsil alıb. Sonralar ailə vəziyyəti ilə əlaqədar Beyləqan rayonuna köçdükləri üçün təhsilini Beyləqan şəhər 1№-li tam orta məktəbdə davam edib.
2016-cı ildə IX sinfi bitirdikdən sonra təhsilini yarımçıq qoyaraq işləyib, valideynlərinə maddi dəstək olmağa başlayıb.
2019-cu ilin aprel ayında SHXÇDX-nin Masallı rayon Şöbəsindən həqiqi hərbi xidmətə çağırılıb. Hərbi xidmətini Tərtər rayonunda yerləşən «N» saylı hərbi hissədə yerinə yetirib.
Vətən müharibəsində iştirak edən Şəmsəddin Ağdərə döyüşlərində fəallıq göstərib. 8 oktyabr 2020-ci ildə Ağdərə istiqamətində düşmən tərəfindən atılan artilleriya mərmisinin partlaması nəticəsində aldığı qəlpə yarasından şəhid olub. Masallı rayonunda dəfn olunub.
Ölümündən sonra "Vətən uğrunda" medalı ilə təltif edilib.
