Paytaxt üzrə 174 məktəb və 123 bağça, regionlar üzrə isə 106 məktəb və 34 uşaq bağçası mərkəzləşdirilmiş qaydada istiliklə təmin ediləcək.
Bu barədə “Azərbaycan müəllimi”nə açıqlamasında “Azəristiliktəchizat” ASC-nin mətbuat katibi Elvin Basqallı məlumat verib.
O bildirib ki, Şuşa, Quba, Qusar, Astara, Lerik, Şabran və Şamaxıda istilik mövsümü noyabrın 1-dən başlayacaq. Bu səbəbdən həmin rayonlarda yerləşən məktəblər və bağçalar da göstərilən tarixdən istiliklə təmin olunacaq.
“Adı çəkilən bölgələrdə ümumilikdə 16 məktəb və bağça istiliklə təmin edilir və bu müəssisələrdə istilik sistemi tam hazır vəziyyətdədir”, – deyə Elvin Basqallı qeyd edib.
