Lənkəran Şəhər Rayon Polis Şöbəsinin əməkdaşları tərəfindən keçirilən əməliyyat-axtarış tədbirləri nəticəsində dələduzluqda şübhəli bilinən 38 yaşlı Nazim Həsənzadə saxlanılıb.
DİN-in Mətbuat Xidmətinin Lənkəran regional qrupundan Cenublu.az-a verdiyi məlumata görə, araşdırmalar zamanı N.Həsənzadənin müxtəlif şəxslərin etibarından sui-istifadə edərək onlara maddi ziyan vurduğu müəyyən edilib. O, özünü vəzifəli şəxslərdən birinin qohumu kimi təqdim edərək müxtəlif məbləğlərdə pul vəsaitlərini ələ keçirib. Bundan başqa, saxlanılan şəxsin şirkətlərdən birinə də maddi ziyan vurduğu məlum olub.
Faktla bağlı N.Həsənzadə barəsində həbs qətimkan tədbiri seçilib, hazırda araşdırmalar davam etdirilir.
Qeyd edək ki, Nazim Həsənzadə bundan əvvəl də işə düzəltmək adı ilə iki nəfərə ümumilikdə 20 min manata yaxın maddi ziyan vurmaqda ittiham olunub. Həmin fakt üzrə cinayət işi başlanılıb və ibtidai istintaq yekunlaşdırılaraq baxılması üçün məhkəməyə göndərilib. Buna baxmayaraq, o, məhkəmə prosesi davam etdiyi dövrdə yenidən eyni əməlləri törətməkdə şübhəli bilinir.
