Bakıda arvadını döyən kişi tutulub.
Cenublu.az-ın əldə etdiyi məlumata görə, hadisənin istintaqı Bakı Ağır Cinayətlər Məhkəməsində keçirilib.
Belə ki, təqsirləndirilən Sahib Əfəndiyev (ad şərtidir) 1990-cı ildə Lerik rayonunda anadan olub. O, Bakı şəhərində yerləşən evdə həyat yoldaşı Telli Əfəndiyeva (ad şərtidir) və övladları ilə birlikdə yaşayır. Hadisə günü Telli ilə Sahib arasında mübahisə yaranıb. Mübahisə səbəb qadının evi və yorğanları yığışdırarkən səliqəsiz davranması olub. Əri isə mübahisə zamanı ona aqressiv formada təhqiramiz cavab verdiyi, evin qapısından çıxmaq istəyərkən yenidən “it“ deyib təhqir etdiyi üçün həyat yoldaşından qisas almaq qərarına gəlib. Buna görə o, Tellinin baş, boyun, üz və qarın nahiyələrinə çoxsayılı zərbələr endirib.
Sahib Əfəndiyev Azərbaycan Respublikası CM-nin 126.1-ci (qəsdən sağlamlığa ağır zərbə vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Sahib Əfəndiyev ona qarşı irəli sürülən ittiham üzrə özünü qismən təqsirli bilib:
“Həyat yoldaşım və övladlarımla birgə yaşayıram. Hadisə zamanı uşaqlar atamgildə idilər. Telli ilə sözümüz çəp gəldi, üzünə sillə vurdum. Anam bizə gəldiyi üçün çölə çıxdım. Hadisədən yarım saat sonra yemək yeyirdik. Yenə aramızda sözlü mübahisə yarandı. Həmin vaxt yoldaşımı vurmaq fikri yox idi, ehtiyatsızlıqdan təpik atdım və ona dəydi. Aramızdakı mübahisə təxminən bir dəqiqə çəkdi. Mübahisəni yaradan da Telli oldu. Səbəbi mənə kobud cavab verərək “it” deməsi idi. Səhəri gün Telli vurduğum yerin ağrıdığını dedi və həkimə getdik. Onu əməliyyat etdilər. İndi yoldaşımla barışmışıq. Əməlimdən peşmanam”.
Sahib Əfəndiyevin ibtidai istintaqdakı ifadəsi elan edilib. O, ifadəsində qeyd edib ki, evdə yorğan-döşəyi yerbəyer etməyə başlayan arvadına daha səliqəli olmaqla bağlı irad bildirib:
“Bunun üstündə mübahisəmiz yarandı. Telliyə sillə vurub, evdən çıxmaq istəyəndə arxamca təhqiramiz sözlər dedi. Əsəbiləşib onu təpikləməyə başladım”.
Daha sonra məhkəmə zalında zərərçəkmiş Telli Əfəndiyeva ifadə verib:
“12 ildir ki, Sahiblə evliyik. Uşaqları yatızdırdıqdan sonra yorğan-döşək üstündə həyat yoldaşımla aramızda söz-söhbət oldu. Daha əvvəl də mübahisələrimiz olub amma məni vurmayıb. O, yorğan-döşəyi səliqə ilə düzməyimi istədi, mən də aqressiv cavab verdim. Sahib sillə vurdu, qapıdan çıxanda ona “it” dedim. O da əsəbiləşib məni təpikləməyə başladı. Hazırda həyat yoldaşımla barışmışam və onun azadlığa buraxılmasını istəyirəm”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Sahib Əfəndiyev 3 il müddətində azadlıqdan məhrum edilib.
Fidan İlqar
