Kənd Təsərrüfatı Nazirliyinin Üzümçülük və Şərabçılıq Elmi Tədqiqat İnstitutu Lerikdə seminarlarda innovativ üzüm bağlarının yaradılması və budama qaydalarını müzakirə edib.
İnstitutun mütəxəssisləri Lerikdə “Yeni üzüm bağlarının salınmasında innovativ yanaşmalar” və “Üzüm bağlarında budama qaydaları” mövzularında seminarlar keçiriblər.
Seminarlarda üzümçülük məhsullarının texnologiyasının təkmilləşdirilməsi, müxtəlif ekoloji şəraitdə yetişdirilən sortların potensialının qiymətləndirilməsi və düzgün üzüm bağı salma texnikaları müzakirə edildi. Mütəxəssislər, üzüm bağlarının salınması zamanı fillokseraya davamlı calaqaltılara calaq edilmiş tinglərin istifadəsi və onların əl ilə çalalara əkilməsinin tənəklərin sürətli inkişafını təmin etdiyini izah ediblər. Eyni zamanda, çalanın optimal ölçüləri, torpaq gübrələnməsi və sulama qaydaları praktiki şəkildə təqdim olunub.
Ən vacib aqrotexniki tədbirlərdən biri olan quru budama yarpaqların töküldükdən 15-20 gün sonra başlayaraq mart ayına kimi həyata keçirilir. Qısa budamada bar zoğlarında 4-5, orta budamada 6-8, uzun budamada isə 9-10-dan 15-20-yə qədər gözcük saxlanması tövsiyə olunur. Bu göstəricilər üzüm sortunun bioloji xüsusiyyətləri və iqlim şəraitindən asılı olaraq müəyyən edilir.
Seminardan sonra iştirakçılara budama, qulluq və xəstəliklərlə mübarizə tədbirləri barədə broşür və bukletlər paylanıb.
