Lerikdə qanunsuz onlayn qumar və mərc oyunları ilə məşğul olanlara qarşı əməliyyat keçirilib.
Cenublu.az xəbər verir ki, polis əməkdaşları tərəfindən keçirilən tədbirlər nəticəsində "Pin-up", "Pinco" və "1Win" adlı onlayn qumar oyunları oynayan 5 nəfər Lerik sakini - İ. Qafarov, O. Heybətzadə, N. Məmmədov, C. Xosrovov və N. Mirzəyev müəyyən edilərək saxlanılıb.
Onlardan bəziləri valideynləri və digər ailə üzvlərinin adına olan bank kartlarından istifadə edərək qanunsuz mərc oyunlarına qoşulublar. Hər biri barəsində müvafiq məsuliyyət tədbirləri görülüb.
Qeyd olunur ki, ölkə hüdudlarından kənarda yaradılmış və qanunsuz fəaliyyət göstərən mərc və digər qumar oyunları ilə məşğul olmaq həm hüquqi məsuliyyət doğurur, həm də kibercinayətin qurbanı olmaq, şəxsi məlumatların və maddi vəsaitlərin itirilməsi riskini artırır.
