Lerikdə məişət tullantılarının qalaqlanması səbəbindən bələdiyyə sədrləri cərimələniblər. Bu haqda məlumatı Cenublu.az bu gün, 3 noyabr tarixində verir.
Belə ki, Lerik Rayon Polis Şöbəsinin əməkdaşları tərəfindən rayon ərazisində sanitariya-gigiyena qaydalarının pozulması hallarının qarşısının alınması məqsədilə tədbirlər aparılıb. Yoxlama zamanı Piran və Hamarmeşə kəndləri ərazisində məişət tullantılarının qalaqlanması zamanı ətraf mühitin mühafizəsi tələblərinə əməl edilməməsi müəyyən olunub.
Nəticədə 2 bələdiyyənin sədri barəsində İnzibati Xətalar Məcəlləsinin 271-ci (sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi) maddəsi ilə protokol tərtib olunub.
Bu istiqamətdə tədbirlər davam etdirilir.
