Qızılca xəstəliyi ilə əlaqədar Lənkəran rayonunun təhsil müəssisələrində dezinfeksiya işlərinə başlanılıb. Bu haqda məlumatı Cenublu.az bu gün, 13 dekabr tarixində ARB Cenub-a istinadən verir.
Cari ilin aprel ayından ölkəmizdə qızılca xəstəliyi paytaxtdan başlayaraq rayonlarda da sürətlə yayılır. Lənkərana gəlincə isə hazırda rayonda ölümlə nəticələnən hadisə qeydə alınmayıb.
Belə ki, azyaşlı uşaqlar arasında yayılan xəstəlik cənub bölgəsinin 15 məktəbində yüngül də olsa, aşkar edilib. Bu səbəbdən hazırda təhsil ocaqlarında 1 həftədir ki, dezinfeksiya işləri aparılır.
“Vəziyyət hal-hazırda stabildir. 15 təhsil müəssisəmizdə aşağı sinif şagirdlərindən qızılca xəstəliyinə yoluxanlar var. Onlar hal-hazırda stasionar şəkildə müalicələrini davam etdirirlər. Tədris üçün heç bir problem yoxdur”, – deyə Lənkəran rayonu üzrə təhsil sektorunun aparıcı məsləhətçisi Cəmil Axundzadə bildirib.
Dezinfeksiya işləri Lənkəran şəhər 2 nömrəli, Rövşən Bədəlov adına Lənkəran şəhər 9 nömrəli, Azər Məhərrəmov adına Lənkəran şəhər 7 nömrəli tam orta məktəblərdə başa çatıb. Bu həftədən başlayaraq rayonun Tükəvilə kənd tam orta məktəbi və Mehman Bağırov adına Lənkəran şəhər 1 nömrəli tam orta məktəblərində həyata keçiriləcək.
Qeyd edək ki, xəstəliyin yayılmasının səbəbi immunitet zəifliyi və bu xəstəliyə qarşı vaxtında peyvənd olunmamasıdır.
