Lənkəran-Astara Regional Təhsil İdarəsinin tabeliyində fəaliyyət göstərən məktəbdənkənar təhsil müəssisəsi - Lənkəran Şəhər Uşaq-Gənclər İnkişaf Mərkəzində sərgi keçirilib.
muallim.edu.az xəbər verir ki, mərkəzdə “Ekologiya” bölümü üzrə dərnək rəhbəri və dərnək üzvlərinin iştirakı ilə təşkil edilən bu yaradıcılıq sərgisinin adı “Tullantılardan incəsənətə” olub. Bu sərgi Mərkəzin Tədbirlər planına əsasən “Yaşıl dünya naminə həmrəylik ili” çərçivəsində keçirilən tədbirlərin davamı olaraq təşkil edilib.
“Tullantılardan incəsənətə” sərgisində iştirak edən şagirdlərin əksəriyyəti Velədi kənd ümumi orta məktəbində fəaliyyət göstərən “Təbiətsevərlər” dərnəyinin üzvləridir. 2011-ci ildən Lənkəran rayonu Velədi kənd ümumi orta məktəbində “Təbiətsevərlər” dərnəyinə rəhbərlik edən Gülarə Məmmədova fikirlərini belə ifadə edib: “Bütün bu uğurları görərək hər zaman deyirəm ki, nə yaxşı ki, mən müəllim olmuşam. Müəllimlik çətin olsa da, olduqca məsuliyyətli və dəyərli peşədir”.
Dərnək üzvləri ətrafa atılan tullantılara yeni nəfəs verərək təbiətə olan sevgilərini bir daha nümayiş etdiriblər. Sonda şagirdlərin düzəltdikləri əl işləri nümayiş olunub.
“Tullantılardan incəsənətə” sərgisində Lənkəran Şəhər Uşaq-Gənclər İnkişaf Mərkəzinin dərnəklərinə bu ildən qoşulan Lənkəran şəhəri V.Əliyev adına 4 nömrəli humanitar təmayüllü məktəbin şagirdləri və başqa azyaşlı uşaqlar da tullantılardan hazırladıqları əl işlərini nümayiş etdiriblər.
