Lənkəran rayonunun Separadi kəndində cari ildən etibarən yeni qaragilə sortlarının əkininə start verilib. Bu haqda məlumatı Cenublu.az bu gün, 3 oktyabr tarixində ARB Cenub-a istinadən verir.
Kənddə ən müasir aqrotexniki xidmətlərin aparıldığı bağda 7 hektara yaxın ərazidə qaragilə sahəsi salınıb. Ümumilikdə təsərrüfat sahəsində 20 min tingin əkilməsi planlaşdırılıb. Təsərrüfat rəhbəri bildirib ki, iki ilə məhsul nəinki yerli, həmçinin xarici bazarlara da çıxarılacaq.
Rəhbərin sözlərinə görə, Türkiyədən 3 yeni qaragilə sortu gətirilib və hər bir sortun yetişmə dövrü fərqlidir. Belə ki, bu, bazarı daim meyvə ilə təmin etməyə imkan verəcək. Sortların bir üstünlüyü də xəstəlik və zərərvericilərə, eləcə də şaxtalı havalara qarşı davamlı olmasıdır.
Qeyd edək ki, yeni sort qaragilə bitkiləri əkildikdən sonra növbəti ildən artıq məhsul verməyə başlayır. Sonrakı illərdə isə ildən ilə məhsuldarlığı daha da artaraq 3-5 kq, hətta 7 kq-a qədər məhsul verə bilər.
