Lənkəranda yandırılaraq qətlə yetirilən 53 yaşlı Əli Eldar oğlu Cahangirovun son günü barəsində qızı Nərmin Əli qızı Cahangirzadə açıqlama verib. Bu haqda məlumatı Cenublu.az bu gün, 27 oktyabr tarixində verir.
Belə ki, o, atasının TİR sürücüsü olduğunu bildirib:
“Sonuncu dəfə atamla 24 oktyabr axşam saatlarında əlaqə saxlamışıq. Bizə Qazaxda olduğunu, sərhədi keçəcəyini bildirmişdi. 2 gün sonra, yəni 26 oktyabr tarixində isə meyiti Lənkərandan tapıldı. Onu öldürüb, sonra yandırıblar. Ailəmizin heç kimlə ədavəti olmayıb. Düşünürük ki, bunu pula görə ediblər. Çünki üstündə xeyli miqdarda pul var idi – malın pulu, reysin pulu. Ümid edirik ki, cinayətkar tezliklə tapılar və öz layiqli cəzasını alar”.
Qeyd edək ki, 26 oktyabr tarixində Lənkəran şəhərinin Heydər Əliyev prospektində, dəniz kənarında meyit aşkarlanmışdır. Polis və prokurorluq əməkdaşlarının birgə keçirdikləri tədbirlər nəticəsində meyiti aşkar olunmuş şəxsin Lənkəran şəhər sakini, 53 yaşlı Cahangirov Əli Eldar oğlu olduğu müəyyən olunmuşdur.
