Lənkəran şəhər İcra Hakimiyyətinin başçısı Taleh Qaraşov Lənkərandan olan şəhidlərin məzarlarını ziyarət edib. Bu haqda məlumatı Cenublu.az bu gün, 2 noyabr tarixində verir.
Beləki, şəhid Əli Mehdizadə, Elnur Talıbov və Kənan Axundzadənin anım günündə məzarlarına baş çəkilib. Ziyarət mərasimində icra başçısı ilə yanaşı, icra aparatının rəsmi şəxsləri, rayon ictimaiyyətinin nümayəndələri və şəhid ailələrinin üzvləri də iştirak ediblər.
Qeyd edək ki, Əli Mehdizadə ölümündən sonra 3-cü dərəcəli “Rəşadət” ordeninə, “Vətən uğrunda”, “Şücaətə görə”, “Cəsur döyüşçü”, “Kəlbəcərin azad olunmasına görə”, “Xocavənd azad olunmasına görə“ və “Şuşanın azad olunmasına görə” medalları ilə təltif olunub.
Şəhid Elnur Talıbov ölümündən sonra 3-cü dərəcəli “Vətənə xidmətə görə” ordeni, “Vətən uğrunda”, “Cəsur döyüşçü”, “Xocavəndin azad olunmasına görə” və “Füzulinin azad olunmasına görə” medalları ilə təltif edilib.
Kənan Axundzadə ölümündən sonra 3-cü dərəcəli “Vətənə xidmətə görə” ordeni, “Vətən uğrunda”, “Cəsur döyüşçü”, “Xocavəndin azad olunmasına görə” və “Füzulinin azad olunmasına görə” medalları ilə təltif olunub.
