Lənkəran-Astara Regional Gənclər və İdman İdarəsinin rəisi Teymur Babazadə Lənkəran şəhər sağlamlıq imkanları məhdud uşaqlar üçün xüsusi internat məktəbini ziyarət edib. Bu haqda məlumatı Cenublu.az bu gün, 15 noyabr tarixində verir.
Görüşdə, həmçinin idarənin əməkdaşları, idman ictimaiyyətinin nümayəndələri və könüllü gənclər cəlb olunaraq, əyləncəli açıq idman və inklüziv hərəkətli tədbir təşkil ediblər.
Belə ki, tədbirin keçirilməsində məqsəd bu kateqoriyadan olan şəxslərin cəmiyyətə inteqrasiyasının dəstəklənməsi, əlilliyi olan yeniyetmələrin fiziki fəallığı üçün bərabər imkanların yaradılması, eyni zamanda həyat keyfiyyətinin yaxşılaşdırılması və sosiallaşmasını təmin etməkdir.
Xatırladaq ki, uşaq və yeniyetmələr üçün keçirilən idman tədbirinə Beynəlxalq dərəcəli hakim, Əməkdar məşqçi Məmməd Məmmədov və Fəzail Əbilov rəhbərlik ediblər.
Qeyd edək ki, sağlamlıq imkanları məhdud uşaqlar üçün xüsusi internat məktəbində Lənkəran, Astara, Lerik, Yardımlı, Masallı, Cəlilabad rayonlarından olan xüsusi qayğıya ehtiyacı olan uşaq və yeniyetmələr təhsil alırlar.
