Lənkəran-Astara Regional Gənclər və İdman İdarəsi tərəfindən “Region gənclərinin və idmançılarının həmrəylik forumu” adlı tədbir keçirilib.
Azertag.az xəbər verir ki, tədbirdə Lənkəranın 2024-cü ildə ölkənin Gənclər Paytaxtı və Türk Dünyasının Gənclər Paytaxtı statusları, eləcə də “Yaşıl dünya naminə həmrəylik ili” çərçivəsində həyata keçirilən tədbirlər barədə ətraflı məlumat təqdim edilib. Forum çərçivəsində beynəlxalq, Avropa və dünya miqyaslı yarışlarda yüksək nailiyyətlər əldə edən idmançılar xüsusi mükafatlarla təltif olunublar.
Çıxış edənlər belə tədbirlərin gənclər və idmançılar arasında həmrəylik ruhunun gücləndirilməsi, onların uğurlarının tanınması baxımından böyük əhəmiyyət kəsb etdiyini vurğulayıblar.
İlin yekunlarına həsr olunan tədbirdə regionun müxtəlif idarə, müəssisə və təşkilatlarının, ictimai birliklərin və qeyri-hökumət təşkilatlarının nümayəndələri, eləcə də ölkənin müxtəlif bölgələrindən gələn gənclər iştirak ediblər. Tədbir zamanı, həmçinin gənclərlə iş sahəsində fərqlənən şəxslər, dövlət qurumları ilə səmərəli əməkdaşlıq edən nümayəndələr və idmançılar müxtəlif nominasiyalar üzrə mükafatlandırılıblar.
Forum konsert proqramı və gənclərin birgə ifa etdiyi “Həmrəylik himni” ilə yekunlaşıb.
