Lənkəran rayonu ərazisində aparılan genişmiqyaslı iməcilik işləri davam edir. Bu haqda məlumatı Cenublu.az bu gün, 6 sentyabr tarixində verir.
30 avqust tarixindən başlanılan iməcilik Tədbirlər Planına uyğun davam etməkdədir. Son 2 gün ərzində qrafikə uyğun olaraq, Lənkəranda bir sıra küçələrdə təmizlik işləri görülüb.
İlkin mərhələdə şəhərin 20 küçəsində başlanılan iməcilik son 2 gündə daha 6 küçə və bir prospektdə davam edir. Z. Əliyeva, M.P.Vaqif, Nəsimi, Hacılar, Səttərxan, H.Z.Tağıyev küçələri və Heydər Əliyev prospektində təmizlik işlərinə başlanılıb. Bundan başqa, rayonun magistral yollarının ətrafları kol-kosdan təmizlənir, yolboyu hasarlar rənglənir. Küçələrdə və prospektdə suötürücü kanallar alaq otlarından təmizlənir, bordürlər rənglənir, agacların gövdələri əhənglə ağardılır və piyada səkiləri bərpa edilir. Sözügedən küçələrdə işıqlandırma ilə bağlı bütün zəruri olan işlər görülür.
Qeyd edək ki, iməcilik hava şəraitindən asılı olaraq, sentyabr ayının sonunadək davam edəcək.
