Lənkəranda qonşular arasında yaranan mübahisə fiziki qüsurlu şəxsin xəsarət alması ilə nəticələnib.
Cenublu.az xəbər verir ki, hadisə rayonun Türkəkəran kəndində baş verib. Mübahisə zamanı kənd sakini, 1974-cü il təvəllüdlü Mələk Nəsirova Nərminə Əliyevanın hücumuna məruz qalıb. Baş və üz nahiyəsindən xəsarət alan M.Nəsirova xəstəxanaya çatdırılıb. Qarşı tərəf isə M.Nəsirovanın ona hücum etdiyini iddia edib.
Qeyd edək ki, M.Nəsirova birinci qrup əlildir, anadangəlmə lal və kardır.
DİN-in Mətbuat Xidmətinin regional qrupundan Cənublu.az-a verilən məlumata görə, tərəflərin qarşılıqlı müraciəti əsasında hazırda Lənkəran Şəhər Rayon Polis Şöbəsində təhqiqat aparılır. Təyin olunmuş müvafiq ekspertiza və araşdırmanın nəticəsinə əsasən məsələyə hüquqi qiymət veriləcək.
