Lənkəranda narkotik vasitələrin qanunsuz dövriyyəsində şübhəli bilinənlər tutulublar. Bu haqda məlumatı Cenublu.az bu gün, 11 sentyabr tarixində verir.
DİN-in verdiyi məlumata görə, Baş Narkotiklərlə Mübarizə İdarəsinin əməkdaşları tərəfindən Lənkəran şəhərində keçirilən əməliyyat tədbirləri ilə qanunsuz dövriyyədən 14 kq-dan artıq narkotik vasitə çıxarılıb.
Şubhəli bilinən 21 yaşlı Süleymanov Vüqar İlqar oğlu və əvvəllər Cinayət Məcəlləsinin müxtəlif maddələri ilə (332.2.1, 332.2.3 152.1) məhkum olunan 25 yaşlı Ömərov Əhməd Kamran oğlunun üzərində 1 kq-dan artıq heroin, 13 kq 300 qram qurudulmuş marixuana və 1 ədəd kəsici alət aşkar olunub.
Onlardan biri saxlanılan zaman polis əməkdaşlarına xəsarət yetirməyə cəhd göstərib və bu yolla hadisə yerindən yayınmağa çalışıb. Bu cəhdin qarşısı polis əməkdaşları tərəfindən alınaraq onların saxlanılması təmin edilib.
V.Süleymanov və Ə.Ömərovun narkotik vasitələri İran İslam Respublikasının vətəndaşı, "Əmi" adı ilə tanıdıqları şəxs vasitəsilə Lənkərandan paytaxta ayrı-ayrı şəxslərə çatdırılaraq qanunsuz dövriyyəyə buraxılması məqsədilə əldə etdikləri aşkarlanıb.
Fakt üzrə əməliyyat-axtarış, əməliyyat-istintaq tədbirləri davam etdirilir.
